Веројатно го знаете тој момент – стоите во сообраќаен метеж, а додека надвор владее пеколна летна жештина, внатре во кабината пријатно ве лади клима уредот. Малкумина од нас некогаш се запрашале како всушност функционира, бидејќи во модерните возила тоа е нешто што го земаме здраво за готово. Но привилегијата да вдишуваме разладен воздух додека асфалтот под тркалата се топи, има своја цена – таа се одразува преку зголемена потрошувачка на енергија или гориво.

Сепак, тоа може да се ублажи со правилна употреба на климата – а потребно е да внимаваме и на здравјето.

Активирање на ладење или греење во електрично возило ќе ја намали автономијата за неколку километри. Во летните месеци, ладењето со клима обично троши многу помалку електрична енергија од греењето во зима.

Денес, штом ни стане жешко, речиси автоматски ја вклучуваме климата и ја местиме посакуваната температура. Тоа е возможно благодарение на едноставното ракување со неколку копчиња.

Клима уредот во автомобил не го лади само воздухот, туку ја намалува и влагата. Функционирањето на автомобилската клима е слично како онаа во домашни услови – за да се намали жештината и влажноста, потребна е енергија. Но како да ја намалиме таа потрошувачка?

Започнете со класичниот пристап

Ако возилото било паркирано на сонце и внатре владее неподнослива жештина, најпрво треба да се проветри кабината. Тоа е многу поефикасно отколку веднаш да ја вклучите климата. Едноставно: отворете ги сите прозорци и повозете се неколку метри со ниска брзина. Многу ефикасни се свртувања под 90 степени, кои со движење на свеж воздух ја истиснуваат топлината од возилото.

Кога сте во (краток) застој, спуштете ги прозорците

Ако е можно, при паркирање на жежок ден, оставете ги прозорците малку отворени. Тоа ќе ја намали температурата внатре во возилото. Колку помалку е загреана внатрешноста, толку помалку енергија ќе биде потребна за ладење – а и побрзо ќе престанете да се потите.

Зголемувајте ја јачината на климата постепено

Климата не може да работи со полна сила веднаш штом ќе ја вклучите. Ако веднаш ја туркате до максимум, нема да работи оптимално. Ова е особено видливо кај автоматските клима уреди, кои започнуваат со побавно ладење, па постепено ја зголемуваат моќноста и брзината.

Искористете го копчето за рециклување на воздухот

Секако дека сакате вашето возило внатре да биде пријатно разладено. Но, топлиот воздух однадвор не помага многу. Штом климата започне со ладење, активирајте ја функцијата за внатрешна циркулација. Тоа значи дека климата ќе го лади веќе разладениот воздух од кабината, наместо постојано да внесува топол воздух однадвор. Со тоа ќе се намали потребната енергија за ладење.

Редовно сервисирање е задолжително

Редовното одржување е клучно за оптимално функционирање на клима уредот. Прво, треба да се заменува филтерот за кабина. Препорачливо е барем еднаш годишно да се изврши дезинфекција на каналите и отворите за воздух, како и дополнување на климата со гас. За корисниците на Avant2Go, овие обврски не постојат – за тоа се грижи нашата сервисна екипа. 😉

И внимавајте на… вашето здравје

Не е паметно да се создава голема температурна разлика помеѓу надворешниот воздух и внатрешноста на возилото. Ако надвор е многу жешко, немојте внатре да создавате услови за поларна мечка. Телото не може веднаш да се прилагоди на екстремни температурни разлики – тоа може да предизвика вртоглавица, или барем непријатна настинка. За да избегнете прегревање, температурата од 24°C е сосема доволна. Исто така, пред крајот на возењето добро е температурата во кабината да се доближи до надворешната, за да не доживеете температурен шок.